Karta Bá Lideransa Partidu Polítiku.
Karta Bá Lideransa Partidu Politiku.
Ha’u naran Mauloi, hela besik iha dalan ne’ebé bai-bain ukun-nain sira liu-bá mai ho kareta luxu, ha’u aktividade servisu núdar ema agrikultor. Dader hakat-ain hósi uma antes loron-matan mosu no fila hósi to’os depois loron matan lakon – Dalaruma ha’u bá to’os laran tarde, tanba ha’u-oan kaduak nain-rua ne’ebé moris iha tinan,fulan,loron no oras hanesan. Maibé minutu diferente, inklui mós naran. Wainhira ha’u to’o tarde iha servisu fatin no to’os laran, ha’u sente laran susar tanbá tempu balun ha’u hosik le’et no servisu ne’ebé ha’u halo hotu iha tempu besik nakfilak bá tempu naruk – Ha’u lahatene ukun nain sira hanoin hanesan ha’u ka la’e?
Tempu muda-án, ha’u-oan kaduak nain-rua, Ho naran batismo Maria da silva ho Jesus da costa, nia tinan aumenta bá bebeik no hahu inklina-án iha parte aprende formal – Nesesidade moris aumenta todan, ha’u ai-han folin ladiak iha mekadu. Tanbá, laiha ukun nain ne’ebé iha planu di’ak atu dezenvolve setor agrikultor ho kualidade ne’ebé diak no justu – Maibé ha’u nafatin esforsu liu dalan diferente halibur hahan no buka osan bá augenta moris, tánba! ha’u iha esperensa, liu hósi aprende formal ha’u oan nain-rua sei asesu bá kampu servisu.
Ha’u oan nain-rua nia kareria aprende formal iha ensinu superior, besik atu remata liu hósi telefone sira-rua dehan bá ha’u ho nia mama katak: “ami-rua atu gradua iha fulan ida ne’e nia laran,mama ho papa keta haluha rai hamutuk osan no mai akompania ami-rua nia graduasaun”. Diak, hatan hósi ha’u ho nia mama – Dader madrugada tuku lima, antes rai hun mutin, ha’u ho ferik-oan, bai-bain ami toman liu bolu-malu doben, viagen ho bus bá akompania ha’u oan nain-rua nia graduasaun iha sidade, fatin refere nakonu ho buat oi-oin no sasan hirak ne’e, balun ha’u lahatene nia naran – honestu dahuluk ha’u tun sidade, akompania ha’u oan nia gradusaun ho kontente. Tanbá ha’u hanoin, “tempu ne’ebé besik sira nain-rua bele asesu ona iha kampu servisu, baseia bá surat tahan mutin ne’ebé hatintan ho ai-ben, dalawain ema bolu diploma”.
*
Realidade muda-an, latuir hanoin no esperansa ne’ebé ami iha, depois gradusaun remata, ha’u oan nain-rua lori diploma la’o lemo-lemo iha sidade laran buka fatin servisu – Lahetan, tanbá sira-rua nia inan ho aman sarani mós ema agrikultor hanesan ha’u. karik momentu ne’ebá ha’u ho sira-rua nia mama buka ema ho estatus sosial dirente ho ami-rua iha kapitál no inklina-án iha ukun Oligarkia. Parese ha'u oan bele asesu iha kampu servisu. Maske, laiha Diploma.
Tempu elisaun mós besik mai dadaun, klima afiliasaun, konta istoria no hatun malu la’o iha fati-fatin. Liu hósi karta, ha’u-oan Jesus hateten bá ha’u katak:
Papa tempu elisaun agora labele tuir no ita golput. Tanbá lideransa sira ne’ebé ohin loron inklina-án iha partidu politiku, hósi A to’o Z laiha ida mak mai ho prinsipio justu. Maibé golput de’it lanaton, tempu besik ha’u sei fila bá ho ita nia partidu politiku ne’ebé mai ho nia prinsipiu justu, partidu ne’ebé ita iha la’os deit instrumentu bá demokrasia eleitoral.Maibé nudar mós instrumentu ba konsiensializasaun masa. Ita nia partidu ne’ebé ha’u atu lori bá ne’e, konkorda ho Karl Marx nia hanoin kona-bá luta bá halakon klase sosial no hari hikas kultura kolektivu ne’ebé uluk ita beiala sira hanorin hela bá ita.
Ha’u lakonsege halo leitura bá karta ne’e to’o lina final. Tanbá oras servisu la’o ba dadaun, ha’u foti ai-suak ho katana tama bá to’o laran, kontinua ha’u servisu no hanoin hetan liafuan ne’ebé ha’u oan feto koalia bá ha’u liu telefone, iha loron lima bá kotuk katak:
Apa hato’o hela bá mama diploma ne’ebé ha’u iha, sai hanesan surat tahan mamuk ne’ebé laiha valor. Ha’u moris iha fatin ne’ebé klo’ot no la sai nain ona bá ha’u isin. Ha’u isin ohin loron sai hanesan sasan ne’ebé ema riku sira fa’an hodi hetan osan no haforsa kapital. Iha ne’ebá kuidadu-malu ho domin ne’ebé imi iha, ha’u ohin loron sai feto sala nain no prostituta.
Liafuan hirak ne’e, dalawain halo ha’u laran susar no lakon esperansa bá moris iha ha’u iha servisu fatin. Maibé ha’u nafatin iha esperansa bá oan mane ho naran jesus nia liafuan: “Ita nia partidu ne’ebé ha’u lori bá ne’e konkorda ho Karl Marx nia hanoin kona-bá luta bá halakon klase iha sosiadade no hahoris hikasa kultura koletivu, hakahur-án ho moris diak no justu ne’ebé uluk ita beiala sira hanorin hela bá ita.
Remata.
Loron 12-3-2023.
ANONIM.
